Lærarutdanninga får ofte kritikk for å vere for teoretisk. Mange studentar saknar meir opplæring i korleis dei skal undervise i praksis når dei kjem ut i skulen.

Det får dei no på Universitetet i Agder (UiA) gjennom undervisinga til Amalie Sødal.

Ho forskar på undervisningsmetodar i matematikk, og tok nyleg doktorgrada med ei avhandling om undervisning i matematikk.

Ressursbank

– Alle lærarar utviklar etter kvart ein ressursbank for ulike fag dei underviser i. Med dette opplegget får studentane allereie frå dag éin som lærar med seg ei rekkje med ulike metodar for å lære elevane matte, seier Sødal.

Ressursbanken er ei samling med ulike oppgåver, aktivitetar, refleksjonar og tankar rundt læring og undervisning av matematikk. 

I tillegg inneheld han tips om forskingslitteratur som gir praktiske råd om gode undervisningstimar.

– Ressursbanken skal hjelpe med overgangen frå student til lærar, frå eiga læring til å undervise og lære bort til andre, seier Sødal.

Eigarskap til undervisninga

Forskaren har ikkje laga éin ressursbank til alle studentane. Studentane har sjølv laga sine eigne samlingar med ressursar – under rettleiing av Sødal.

Ho seier det er nokså nyttelaust å arve opplegg for undervisning frå andre.

– Du kan lære av andre og late deg inspirere, men undervisninga vert best når du sjølv tenkjer gjennom detaljar og heilskap frå botnen av. Slik får du eigarskap til undervisninga. Du får stoffet under huda og vert tryggare når du underviser, seier ho.

Studentane har altså sjølv bestemt kva som skal vere med i ressursbanken. Dei har sjølv formulert korleis dei ulike opplegga for undervisning og læring kan brukast i skulen. 

I tillegg har dei skrive ned kva for teoriar og kjelder som byggjer opp under tiltaka.

– Ein ressursbank skal ikkje berre vere ei samling med mange tips. Det skal vere personlege ressursar som viser tilbake til lærarane og deira tankar om matematikk, seier Sødal.

Byggjer bru mellom teori og praksis

Sødal arbeidde med sju studentar. Dei utvikla kvar sin ressursbank gjennom eitt år.

Resultata viser at ressursbanken kan byggje bru mellom teori og praksis og betre undervisninga. Sødal trekkjer fram tre gevinstar ved å jobbe på denne måten:

1. Sjølvinnsikt og sjølvtillit: Studentane oppdagar korleis dei sjølv tenkjer om undervisning i matematikk, korleis dei kan bruke det i praksis og vert tryggare i klasserommet.
2. Testing og justering: Ulike måtar å undervise på vert prøvd og justert undervegs når studentane er i praksis på ein skule.
3. Teori og praksis: Ressursbanken lærer studentane korleis dei kan bruke ulike teoriar til å støtte opp ulike metodar og aktivitetar i undervisninga.

Føler seg profesjonelle

– Etter at studentane har jobba med ressursbanken eit heilt år, sit dei att med ei kjensle av profesjonalitet. Dei kjenner at dei beherskar feltet, og at dei har fått ein nyttig bagasje og ei viss tyngde som mattelærar, seier Sødal.

Studentane sjølve har formulert seg slik om ressursbanken:

• Josefine: Eg skulle ønskje dette vart introdusert tidlegare på lærarstudiet, då eg trur det er fleire gode oppgåver eg har gløymt fordi det byrjar å bli ei stund sidan.
• Henning: Eg kjenner meg litt meir profesjonell med å ha den ressursbanken og litt meir klar til ulike mattetimar som skulle kome.
• Gustav: Eg liker korleis det kjennest å ha ressursbanken. Eg liker at eg føler at oppgåvene eg vel er gjennomtenkt, det gir ein kjensle av tryggleik og profesjonalitet.
• Oda: Eg har vorte litt betre rusta for det som ventar når ein byrjar å jobbe, at ein har nokon ess i ermet.

Er ein del av utdanninga

Ressursbanken er no ein del av lektorutdanninga ved UiA. Sødal oppfordrar studentane til å lage eigne undervisningsopplegg og notere erfaringar undervegs.

– Med ressursbanken får lærarar ein tjuvstart, med ei god samling råd om å undervise i matematikk frå første trinn til vidaregåande. Det er lettare å leggje til rette for god og variert undervisning når du har brei kompetanse om matematikk og ulike måtar å undervise på. Ein slik ressursbank kan gjere overgangen frå student til lærar smidigare, seier Sødal.

Referanse:

Amalie Sødal: A Resource Approach to Mathematics Teacher Education. Doktoravhandling, Universitetet i Agder, 2025

Artikkelen er produsert og finansiert av Universitetet i Agder

Universitetet i Agder er én av over 80 eiere av forskning.no. Deres kommunikasjonsansatte leverer innhold til forskning.no. Vi merker dette innholdet for å tydelig skille formidling fra uavhengig redaksjonelt stoff.
Her kan du lese mer om ordningen.

Les også disse artiklene fra Universitetet i Agder:

• 

  Denne forskaren har fått fleire økonomistudentar til å bestå eksamen i matematikk

• 

  Det finnes mange tilfeller av far og sønn på elitenivå i fotball. Hvorfor det?

• 

  Slik brukte vi planter til å beskytte oss mot det onde

• 

  Her ble norske kvinner brent på bålet

• 

  – Tiltak mot utenforskap kan forsterke problemet

• 

  Slik hjelper fisk havet med å lagre karbon

Les flere artikler fra Universitetet i Agder her.

forskning.no vil gjerne høre fra deg!
Har du en tilbakemelding, spørsmål, ros eller kritikk? TA KONTAKT HER